Erenoamáš vuogádat
Go Ruoŧa Sámediggi ásahuvvui 1993 de šattai Sámediggái erenoamáš vuogádat, go dat lea sihke sámiid álbmotválljen ásahus ja lea ráđđehusa vuollásaš hálddahuseiseváldi. Váldo ulbmil lea doarjut sámi kultuvrra ja álggahit doaimmaid ja evttohit doaibmabijuid maiguin ovddida dán kultuvrra. Sámi álbmotválljen ásahussan ja eiseváldin lea Sámediggi guovddážis mearrideamen makkár sámi áššit Ruoŧas galget meannuduvvot.
Máŋgga suorggi áššedovdi eiseváldi
Barggut lea iešguđetge surggiin, nu go servodatplánen, boazodoallu, sámi ealáhuseallin, báikegoddeovdáneapmi, sámi kultuvraovdánbuktimat, kulturárbeáššit, sámegielat, davviriikkalaš ovttasbargu, olmmošvuoigatvuođat, unnitlohkoáššit ja álgoálbmotáššit. Meannuda muhtun muddui maid oahpahusáššiid ja dearvvasvuođa-, vuorrasiid ja valáštallanáššiid váikko Sámedikkis ii leat virggálaš ovddasvástádus daidda.
Sámediggi doaibmá ráđđeaddi ásahussan ja áššedovdi eiseváldin sámi áššiide. Ođđa ráđđádallanláhka áššiide mat gusket Ruoŧa sámiide, mii bođii fápmui njukčamánu 1. b. 2022, nanne Sámedikki vuoigatvuođaid ja geatnegasvuođaid ráđđeaddi ásahusssan.
Guokte doaimma
Sámedikkis leat muhtun muddui guovttelágan rolla. Go lea sihke stáhta eiseváldi virgeolbmuiguin ja sámi parlameanta, mas leat válljejuvvon áirasat, de leat sullasašvuođat suohkaniid, gos válljejuvvon gielddastivrra áirasat, stivra ja lávdegottit mearridit ulbmiliid doaimmaide.
Álbmotválljen ásahussan galgá Sámediggi jođihit politihka mii boahtá ovdán Sámediggeválggas, seammás galgá Sámediggi stáhtaeiseváldin čađahit politihka ja mearrádusaid maid riikabeaivi ja ráđđehus mearridit.
Stivrra ovddasvástádus
Sámediggelága mielde lea stivrras ovddasvástádus Sámedikki doibmii. Sámedikki njuolggadusaid mielde galgá stivra earret eará mearridit eiseváldi jahkedieđáhusa, oassedieđáhusaid ja bušeahta. Áirasat mat válljejuvvojit sámediggeválggas ásahit dievasčoahkkima. Dievasčoahkkin nammada stivrra.
Stivra virgáda hálddahushoavdda. Hálddahushoavda jođiha beaivválaš bargguid direktiivvaid ja njuolggadusaid stivrra mearrádusaid mielde.